Балжан Бақыт Ақ отаудың көркі болыңдар

Жан бауырым, құсың құтты болсын!
Жар етуді жаның қалаған.
Екі жарты бір бүтін боп толсын,
Жұбын табу керек әр адам.
Жалғыз күндер жырақ қалды енді,
Қолға қонып арман шағалаң.
Тәуекелге бекем буып белді,
Жарқын өмір баста жаңадан.

Ақ отаудың көркі болыңдар!
Адалдықтың серті болыңдар.
Қос аққудай қатар жүзсеңдер,
Тоса алмасын толқын-ағындар.
Армандарға барар жолдарда,
Бір-біріңді ертіп алыңдар.


От сезімнен жылу сыйлап әр сәт,
Нұрлы жүзбен күлімдесіңдер!
Оңай олжа, жеңіл бақыт аңсап,
Қиындыққа бүгілмесін бел.
Қос жүректі бөлеп іңкәр күйге,
Ай, Жұлдызым, Күнім десіңдер.
Шаңырағы шайқалмаған үйде,
Мағыналы ғұмыр кешіңдер!